Poukisa Maryse pran desizyon kont 2 palmantè lavalas yo

Yvener millien a écrit:

Poukisa Maryse pran desizyon kont 2 palmantè lavalas yo? Yon lidè ki pa gen lidèchip, se tankou yon chen ki pa gen okenn dan li ye. Tout moun konnen Jean Bertrand Aristide gen yon lidèchip ekstrawòdinè sou majorite pèp ayisyen an. Malgre, Aristide pase mayèt Fanmi Lavalas la bay Maryse Narcisse, depi kèk tan, tout moun konstate li, senatè Moïse Jean Charles vin gen yon popilarite tèrib nan peyi a. Popilarite senatè Moïse la vin efase otomatikman Maryse Narcisse nan Fanmi Lavalas, menmsi se manzè ki kowòdonatè nasyonal pati a. Kidonk, Moïse Jean Charles vin dezyèm pèsonaj politik nan Fanmi Lavalas aprè Aristide. Bagay sa a bay anpil tèt fè mal! Fòk yo jwenn yon fason, pou frennen kwasans popilarite sila a. Se anpeche li pale sou non pati a! Nòmalman, kowòdonatè Fanmi Lavalas ta dwe gen plis lidèchip pase senatè Moïse ak depite Arnel Belizaire. Malerèzman, majorite baz Fanmi Lavalas la pa vle Maryse Narcyse nan tèt pati a. Se sa ki esplike, manzè ap danse laloz pou retade tout kongrè nasyonal, pou ta chwazi yon lòt reprezantan nasyonal avan eleksyon yo. Sa ki pirèd la, menm Arnel rive bat Maryse Narcisse nan popilarite, andedan Fanmi Lavalas. Ou konprann katon an? Kidonk, mwen panse, yon vrè lidè dwe suiv liy revandikasyon pèp li ap defanm nan. Si pèp la vle ale Jeremi, ou pa kapab deside ale Okap-ayisyen. Mwen dakò, yon lidè se yon eklerè li ye pou pèp la. Sepandan, yon lidè pa kapab ap pyetine revandisyon pèp li a, pou li satisfè enterè miltinasyonal yo. Epitou, yon vrè lidè pa kapab ap mache sou kapris ak dikte anbasad. Antouka, si Aristide limenm pa ankouraje prese-prese kongrè sa a, lòbèy fimilyal sa yo ap afebli pati a chak jou pi plis. Paske, yon pati politik dwe gen yon lidè majorite militan yo fè li konfyans. HAÏTI CHÉRIE, Groupe ouvert a écrit: