Ti gason......

Ti gason,

Leve tèt w, gade anlè
wa wè syèl lan ble, solèy la klere.
Se pou w konnen se pou wou tout espas saa ye,
se pou w konnen se pou wou solèy la klere.
Chale ki degaje an se pou chofe w.
Limyè ki fe w fèmen je w lan, li la pou w sa wè klè.

Ti gason, sonje ou se pitit Ayiti.
Ou gen yon plas anba syèl la
menmjan ak tout lòt ayisyen.
Lè solèy lan klere se pou nou tout
jwenm limyè ak chalè.

Sonje ke ti peyi toupiti nou an
se yon gwo peyi ki make linivè
depi zansèt nou yo te fè l tranble
avèk kòlè e fè tonè kraze moun ki te vle
retire dwa nou lan men nou.

Ti gason, lanpwen anyen ki kapab fè w wont
ke wou se ayisyen pitit Tousen ak Desalin.
Memsi gen moun ki ta vle fè w kwè se pa sa.

Sonje se zansèt wou ki fè tout nèg lan tout peyi
pran konsyans ke yo pa jwenn tou sa k pou yo.
Se yo ki fè tout blan konprann
ke nèg pa dwe bese tèt devan pèsonn.

Ti gason, se lan men w peyi a pral chita.
Al lekòl pou w konn li ak ekri,
men se pou w vini ak lide pa w
pou fè peyi w avanse.

Pa kite pèsonn vinn di w kisa ki bon pou wou.
Pwoteje fanmi w ak zanmi w.
Pa kite moun devaste pyebwa lan peyi a.
Fè tout moun respekte sitwayen Ayisyen.
Toujou gade devan w san gade deyè.

Ou kapab resevwa tout moun lakay wou,
men se oumenm ki pou dirije kay ou,
Pa kite yo fè w sa w pa p fè yo.

Aprann defann tèt w, peyi w, fanmi w, zanmi w.
E si se avèk zam pou w fè sa,
Se dwa w, se devwa w.