DESSALINES PA KANMARAD NI JOZYE NI MOYIZ!

DESSALINES PA KANMARAD NI JOZYE NI MOYIZ!

Nan braselide ki tanmen sou fowòm yo osijè estrateji militè Jean-Jacques Dessalines (Respè pou li tout tan!) te itilize pou li ede kwape sanginè esklavajis yo sou zile Ayiti, gen yon konpatriyòt ki itilize ekzanp biblik kote bondye Jideyo-Kretyen an ta touye premye pitit gason Ejipsyen yo, pou li vanje pèp li ta pi pito a, pèp Izrayèl.

Sa se yon gwo erè ki chaje ak danje pou plizyè rezon:

1) Konparezon sa a kore yon move pèsepsyon ki deja fè twòp dega nan sèvo yon pil ak yon pakèt Ayisyen - pèsepsyon listwakont ki ekri nan bib la se reyalite istorik yo ye. Poutan, se chak jou, fouyadò ap montre ki jan listwakont sa yo pa kanpe sou okenn baz istorik. Pa te janm gen okenn pèp Izrayèl ki te esklav nan peyi Lejip. Se yon lejann moun yo envante pou regle koze politik yo. Parekzanp, tyeke atik sa a

http://www.nytimes.com/2007/04/03/world/africa/03iht-moses.4.5130043.html?_r=2&

2) Konparezon an kore yon mit rasis etnosantrik anti-Afriken.

Twa ka Ayisyen pa konnen pèp tankou Amorit yo ki dekri nan bib Jideyo-Kretyen an, se Nèg Lafrik menm jan ak yo ki te nan teritwa yo kè pòpòz, lè yon zenglendo yo rele Jozye debake sou yo ak yon makòn brigan ki di se yon "bon-dye" ki voye yo fè dechoukay sa a pou pèp li pi pito a. Non sèlman se yon lejann, se yon lejann anti-noumenm. Malerezman, mit sa a deja pouse rasin nan peyi a. Lotrejou, jiyè 2012, anba Palè Sansousi, mwen filme yon ekip pwotestan k ap chante ak tout nanm yo, ki jan bondye yo ap adore a toupisan, epi li bon paske LI TOUYE PREMYE PITIT FARAWON.

Podyab! ki lès ki ka esplike frè ak sè nou yo, FARAWON pa te mechan nan listwa veridik la? Se moun ki envante mit pèp bondye pi pito a ki mechan!

Èske ou te konnen, menm Albert Einstein, yon moundebyen, yon jeni syantifik ki te grandi nan yon fanmi Jwif, te esplike aklè pou kisa se moun fou sèlman ki ka kwè yon lejann ensanse konsa.

"...the Bible a collection of honorable, but still primitive legends which are nevertheless pretty childish. No interpretation no matter how subtle can (for me) change this... For me the Jewish religion like all other religions is an incarnation of the most childish superstitions. And the Jewish people to whom I gladly belong and with whose mentality I have a deep affinity have no different quality for me than all other people. As far as my experience goes, they are also no better than other human groups, although they are protected from the worst cancers by a lack of power. Otherwise I cannot see anything 'chosen' about them.
Albert Einstein in "The God Letter"

http://wtvr.com/2012/10/06/einstein-letter-set-for-auction-shows-scientist-challenging-idea-of-god-being-chosen

Ki lès ki ka esplike frè ak sè nou yo, okontrè, si se pa t granmesi FARAWON TIRAKA, bagay yo rele Jidayis la pa t ap menm ekziste anko, alevwa pou Krisyanis...(alewè The Rescue of Jerusalem http://www.henryaubin.com/?page_id=18 )


Ki lès ki te ka esplike yo se NÈG LAFRIK parèy yo GRAN FARAWON KMT yo te ye. Ki lès ki va ede yo konnen bèl travay zansèt yo te reyalize depi sou tan OSIRIS ak IMHOTEP ki te bati piramid FARAWON DYOZÈ a dekwa pou sa ka enspire nou reprann bonnanj nou epi rekomanse bati yon bèl sivilizasyon lajistis?

https://youtu.be/HplD09qFu8w

Dessalines se REYALITE ki te an fas li li te konbat. Dessalines se te bra dwat yon BON dye ki te bon tout bon.....sa vle di yon kreyatè ki gen yon sans lajistis ki solid. BON-dye sa a pa gen anyen arevwa ak pèsonaj mitik, rasis, seksis, anti-syantifik, etnosantrik, chaje ak ensekirite yo dekri nan liv sipèstisyon Jideyo-Kretyen an. Move dye sa a se limenm Boukman te di nou jete vye potre li a. Malerezman jiskaprezan olye nou koute Boukman, anpil nan nou ap fè tèt di, nou refize kraze chenn yo.

Dessalines pa bezwen absolisyon, Dessalines pa bezwen jistifikasyon. DESSALINES te fè sa ki te gen pou fèt la epi se sa ki sa. LESKLAVAJ KABA!

RESPÈ POU DESSALINES POU TOUT TAN GEN TAN!

Jafrikayiti
"Depi nan Ginen, bon Nèg ap ede Nèg!"