Chanjé mèt chanjé metyé.

Chanjé mèt chanjé metyé. Malgré anpil ladan yo deja nan prison. Malgré anpil gwo tèt gentan tonbé, malgré La polis an djapazon nan dengonn yo, malgré MINUSTAH pa vle bese chapo, malgré peyi a komanse konte kèk pa avan, malgré Site Solèy pwèske devni Site Lapè.



Toujou gen you ti gwoup ki di ke yo p’ap bay legen. Ebyen pa bay legen pou wè! La pè a bay yo tèt vire. Vant yo fè yo mal deske lot peyi ap felisite Ayiti, Kò yo grate yo paske Ayiti pa fè manchèt nan près entènasyonal la kòm you péyi kote vyolans pa gen kontwòl.



Yo di , yo p’ap bese le bra ak kidnapinn, zak lasasinay. Gouvènman-an, La polis ak pèp la di tout sa ki pa vle kite sa, ap jwenn bon jan tou prizon, bon jan pikliz, malrezman pafwa yo oblije al san chapo tou.



Ou ka teworize you pèp pou you tan, men ou pa ka teworize-l pou tou tan. Sa komanse chanje e sa dwe kontinye chanje. Van chanjman an p’ap vire bo, péyi a pati, li demare li pa lwen dékolé.



Li lè li tan pou klima lapè a fè de nèg kou Marc Henry, San Malis, Alex Jacques(mwen toujou al Ayiti e envesti an Ayiti), Revelasyon etc al envesti lajan nan péyi yo san kè sote. Ala bèl fèt n’ap fè, fòk nou rejwenn filing vi lannwit bèl ti peyi nou an.



Fok bò lanmé yo se bél pave pou nou al fè flann ak fanmi nou. Fok se bèl otèl ki kouwone rivay viv nou yo. An verite mwen p’ap reve, Nou pati pou de bon.



Se poutèt sa, mwen lanse you avètisman bay tout bandi ki di tou tan bourik pa hanni, yo p’ap kite. Ebyen pa kite ! N’ap pase sou fyèl ou e n’ap kraze-w.



VIV AYITI. PEYI PA-M.PEYI KE MWEN P’AP JANM ABANDONE.

Mèsi Alex pou mesaj sa-a, mwen kontan wè genyen Ayisyen toujou ki wè pi lwen pase nen yo, mwen kontan genyen ayisyen ki pap mode lang-yo toujou, men k'ap pale koze-a jan li ye-a, mwen kontan wè ke mesye sa yo pa arive bafwe tout moun, mwen kontan wè genyen Ayisyen ki wè yon bèl avni pou peyi-a, olye de "mobilizasyon manch long" pou yon nònm.