Ayibobo pou CARLOTA

Joel Sam 7 Oct 2006 - 17:14

Nan fen ane 1980s yo'Kiben yo te debake nan peyi ki gen fwontyé ak Lafrik di Sid ,pou pote kole ak peyi sa yo;de peyi ke blan Sid Afriken yo,t ap fè monte le syèl pa do.

Bagay sa a te vin kilmine nan gwo batay Cuito Canavale ,kote Kiben yo te pyese blan Sid Afriken e se youn nan rezon ke yo te antre nan poupale ak nwa Sid Afriken yo ,ki te ap vin bay akò ant blan yo ak Kongrè Nasyonal Afriken an (ANC).

kIBEN yo te rele operasyon sa a "OPERASYON CARLOTA".

Donk ,kilès CARLOTA te ye?
CARLOTA se te yon Yoruba/Lukumi ki te fèt nan Sid Nijerya ,bò zòn kote peyi BENIN an ye.
Carlota se te esklav sou plantasyon TRIUMVIRATO,ki te gen yon izin sik tou.
Carlota,se te yon gwo pyès fanm,ki pa t manje anyen frèt,depi yo te mennen sou plantasyon,li t ap preche rebelyon.

Kiben yo te toujou ap fè rebelyon kont lesklavay ,men depi apre Endepandans Ayiti,mouvman sa yo t ap pran yon direksyon òganize.Apre tou,ekzanp Ayiti an,te la devan yo,tou pre Kiba a.

Nan ane 1842,1843,CARLOTA t ap òganize plantasyon TRIUMVIRATO an,an menm tan li ap mare kontak ak lòt plantasyon yo.
Carlota te an kontak ak yon lòt fanm vanyan ki rele FERMINA nan izin sik ARCANA ak yon Ganga (sa nou rele gangan ann Ayiti yo) ki te rele EVARISTO.
Preparasyon ap fèt,tanbou ap roule chak swa ,pou voye mesaj.Blan yo menm ki konprann se te seremoni Vodou ki t ap fèt pa t soupsone sa ki t ap pase.
Se pou di tou Relijyon Vodou an ,pa t janm pèsikite nan Kiba,manm jan yo te pèsekite l ann Ayiti.

Le 2 Out 1843,plantasyon ARCANA kanpe .Men yo te twò prese ,se sa k fè yo te arete FERMINA e mete l anba kòd.
CARLOTA ,limenm li t ap pran tan l.
Nan nwit 3 Novanm 1843 ,CARLOTA pran manchèt li,li di esklav plantasyon TRIUMVIRATO yo,ANN AVAN.
CARLOTA ak konpayèl li yo,koupe tèt gad nan plantasyon ak izin sik lan;manmzèl pran devan ak manchèt li lan men l,e yo mache sou plantasyon ARCANA.
CARLOTA libere FERMINA kavalye polka li ,li pran ARCANA e li voye mesaj bay lòt plantasyon nan MATANZAS yo.Sa w tande an,se tout pwovens MATANZAS LAN ki rantre an rebelyon ak kèk plantasyon nan zòn La Havàn lan tou.
Rebèl yo ak CARLOTA alatèt yo,libere SARAMILLA DEL ENCOMENDADOR,GUANABANA,SANTA ANA,SAN MIGUEL CONCEPCION,SAN LORENZO,SAN RAFAEL elatriye!

Rebèl yo pa t sèlman atake izin sik,yo atake plantasyon Kafe ak fèm kote yo elve bèf.
Bagay lan mare vre ;Blan panyòl yo koumanse pè,menm Ameriken yo ki te yon peyi esklavajis nan epòk lan pa t alèz tou.
Pa bliye Kiba se sèlman 90 mil li ye de kòt Florida yo.
Gouvènman Ameriken voye yon Bato de gè ki rele VANDELIA sou zòd AMIRAL CHAUNCEY pou ofri Kolonyalis Panyòl yo èd pou kraze rebelyon an.
Rebèl yo,ak CARLOTA alatèt yo fè 5 mwa ap goumen.
Nan kòmansman mwa mas 1844,Twoup panyòl yo pran FERMINA nan yon anbiskad e yo touye manmzèl.
Nan fen mwa ak twoup ki te siperyè an nonm ke twoup CARLOTA yo,blan panyòl ansèkle manmzèl e yo kaptire l.

Panyòl yo te vle bay yon ekzanp ak manmzèl.Yo mare 4 chwal nan men ak pye li e yo dechire li pak an pak.
Apre sa panyòl yo mennen yon represyon grenn kraze.Yo touye tout moun ki te patisipe nan rabelyon ,menm lè yo te jwenn yon nwa Lib,yo touye yo tou.

Kiben yo,pa janm bliye CARLOTA fanm vanyan sa a.Yo di ke pandan batay CUITO CANAVALE AN,lè Kiben yo t ap pyese Blan Sid Afriken yo;ou tande yo ap rele :
'CARLOTA NOU TOUNEN" pou montre rekonesans yo bay pitit Lafrik sa a!

Rodlam Sans Malice Sam 7 Oct 2006 - 19:43

kom toujou bon bet nou di w mesi.Sa se te yon fanm vanyan vre.

Ayibobo pou CARLOTA

Ayibobo pou CARLOTA

Re: Ayibobo pou CARLOTA